Баткен областынын алыскы сегиз айылынын жашоочуларын дарыгерлер акысыз текшеришти

«Үй-бүлөнү пландоо кыргыз альянсы» КБ («ҮПКА» КБ) Кыргыз Республикасынын Саламаттык сактоо министрлиги (КР ССМ) менен биргеликте Улуу Британиянын Өкмөтүнүн жана БУУнун Кыргызстандагы Калк жайгаштыруу фондунун каржылык колдоосу астында “Баткендик аялдарды жана кыздарды комплекстүү колдоо” долбоорунун алкагында калкка энелик жана репродуктивдик ден соолукту коргоо боюнча медициналык кызматтарга жеткиликтүүлүгүн камсыздоо максатында бир катар комплекстүү иш-чараларды өткөрүп жатат. 

2023-жылдын октябрь айында КР ССМ жана “ҮПКА” КБ Баткен областындагы чек арага жакын жайгашкан 8 айылына  мультидисциплинардык мобилдик клиникалардын барууларын уюштурушкан. 2023-жылдын  3-октябрынан 21-октябрына чейин онколог-маммолог, гинеколог, терапевт жана УДИ-адистерден турган дарыгерлердин командасы Лейлек жана Баткен райондорунун алыскы айылдарындагы аялдарды жана өспүрүм кыздарды акысыз текшерип жана кеңеш беришкен. 

3-октябрдан 12-октябрга чейин мобилдик бригада Лейлек районунун 4 айылында: Интернационал, Кулунду, Ак-Суу  жана Катран айылдарында, ал эми 13нөн 21-октябрга чейин Баткен районунун 4 айылында: Ак-Татыр, Кок-Таш, Боз-Адыр, Ак-Турпак айылдарында болушту. 16 күндүн ичинде дарыгерлердин мультидисциплинардык командасы репродуктивдик курактагы 2086 аялды, өспүрүм кыздарды жана улгайгандарды текшерүүдөн өткөрүшүп, кеңеш беришти, ошондой эле муктаж болгондорду психологдорго консультация алуу үчүн жөнөтүштү. 

Мобилдик клиниканын кызматтарын алып, ыраазы болгон аялдар алардын айылдарына адистердин ушундай сапарларын көбүрөөк уюштуруп турууну өтүнүштү, анткени алар жер-жерлерде тар адистиктеги дарыгерлердин консультацияларын көп ала алышпайт. 

Кошумча медициналык текшерүүнү же болбосо адистердин консультацияларын талап кылган оорулар аныкталган учурда, дарыгерлер адистештирилген дарылоо мекемелерине сунуштамаларды беришти. Ошондой эле текшерүүнүн жыйынтыктары жер-жерлердеги саламаттык сактоо уюмдарынын жетекчилерине бейтаптарды андан ары көзөмөлдөө жана кароо үчүн өткөрүлүп берилди. 

Мобилдик клиниканын ишин жүзөгө ашырууга бардык кызыктар адамдар: жергиликтүү бийлик органдары, саламаттык сактоо уюмдары жана жарандык коомчулук тартылды, алар аялдардын жана кыздардын ден соолукка байланышкан кызматтардан пайдалануусун камсыздоо үчүн биримдикте иш алып барышты.